பாளையங்கோட்டை தூய சவேரியார் மழலையர் மற்றும் தொடக்கப்பள்ளியின் பொன்விழாக் கொண்டாட்டம்

அகரம் கற்றுத்தந்த தொடக்கப் பள்ளிக்குச் சமீபத்தில் சென்று வந்தீர்களா?

முப்பதெட்டு ஆண்டுகளுக்கு முன் நான் படித்த பாளையங்கோட்டை தூய சவேரியார் மழலையர் மற்றும்

தொடக்கப்பள்ளியின் பொன்விழாக் கொண்டாட்டம்..எப்படியோ முகவரி கண்டுபிடித்து எங்களுக்குப் பாடம் சொல்லித்தந்த ராஜம் மிஸ் தொடர்பு கொண்டார்கள்..

மனம்  முப்பதெட்டு ஆண்டுகளுக்கு முன் இறக்கை கட்டிப்பறந்தது. பாளையங்கோட்டை மிலிட்டரிலைன் அருகில் வாட்டர்டாங் கடந்து நடந்தால் தெற்குக்கடைவீதி வரும்.நடுவில் வானுயர்ந்த சவேரியார் சர்ச்..ஏசுநாதர் சிலையை நான் முதன்முதலாகப் பார்த்தது அங்கேதான்.

ஆறுஅடுக்கு உயரகோபுரத்தின் மீது மிகப்பெரிய ஆலயமணி இன்றும்உண்டு பூஜை நேரத்தில் ஒல்லியாய் ஜிப்பா அணிந்த மனிதர் அதன் நடுவில் உள்ள கயிற்றினைப் பிடித்துத் தொங்குவார்.

மணியின் நடுவில் உள்ள நா வெண்கல மணியில் டாணென்று அடிக்கும்போது சத்தம் காதைப்பிளக்கும்,அப்போது அந்த தேவாலயத்தில் இருக்கும் புறாக்கள் படாரென்று ரெக்கையை விரித்துப் பறப்பதைக் காணக்காத்துக் கிடப்போம்.

யாரேனும் இறந்து அடக்கபூசைகுக் கொண்டுவரும்போது மணி விட்டு விட்டு ஒலிக்கும்.1978 ஆம் ஆண்டு நான் யூ.கே.ஜி.மாணவனாக அந்தப்பள்ளியில் சேர்ந்தேன்..

முட்டை ஓட்டுக்குள் ஒடுங்கிக் கிடந்த குஞ்சுப் பறவை திடீரென்று விட்டுவிடுதலையாகி விரிவானில் பறந்த நிலையாகவே அமைந்தது.காதில் தங்கவளையத்தோடு குட்டிக்குட்டிக் குழந்தைகளான எங்கள் வகுப்புத் தோழர்களை மடியில் அமர்த்தி எழுதச் சொல்லிக்கொடுத்த எங்கள் மரகதம்மிஸ் எனும் அன்பாளரைக் கண்டதும் அந்தப் பள்ளியில்தான்.

அந்த அன்பையும் பரிவையும் இன்றுவரை என் மாணவர்களிடம் காட்டிவருவதன் காரணமும் அவர்கள்தான். தூய சவேரியார் மழலையர் மற்றும் தொடக்கப்பள்ளியின் பொன்விழாக் கொண்டாட்டம்.

பள்ளிக்குள் நுழைகிறேன்.அதே போல் எந்த முகப்பூச்சும் அற்று இயல்பாய் இருந்தது பள்ளி.பலகைகளால் மறைக்கப்பட்ட வகுப்பறைகள் குட்டிகுட்டியாய் நீள்இருக்கைப்பலகைகள்.அழகான தமிழ் எழுத்துகள்..

இலட்சரூபாய் செலவளித்தாலும் எந்த ஸ்மார்ட் கிளாஸ் ரூம்களாலும் பதிலீடு செய்யப்பட முடியா அழகியல் சித்திரமாய் என் அன்புப் பள்ளியின் கவின்மிகு வகுப்பறை அமைந்தது.

அதே போன்றதொரு சின்னக்குழந்தையான என் மகனோடு அன்று அந்த வகுப்பறையில் இருந்தேன் என்பது நெகிழ்வான நிகழ்வாய் அமைந்தது.

இன்பமும் பதற்றமும் கலந்த புதுஅனுபவம் அது.ஒரு மாதத்திற்குமுன் முகநூல் நண்பர் திரு.செல்வராஜ் அவர்களின் அன்பு அழைப்பில் திருநெல்வேலி,தச்சநல்லூரில் உள்ள வேதிக் வித்யாச்ரம் பள்ளி ஆண்டிறுதிவிழாவில் பேசியபோதுகூட இயல்பாகத்தான் பேசினேன். 

முப்பதெட்டு ஆண்டுகளுக்குப் பின் அந்தப்பள்ளி என்னைப் பாதிக்கிறது என்றால் காரணம் அன்று கல்வி இயல்பாய் மிதமாய் அன்பாய் அழகாய் போதிக்கப்பட்டது.

இன்று நெருக்கடியும் பெற்றோரின் அளவுக்கதிகமான அழுத்தமும் பொருளாதாரத்தோடு தொடர்புபடுத்தப்பட்ட வணிகமயமும் மாணவர் ஆசிரியர் உறவை எதிர்நிலையில் கொண்டுசென்றுவிட்டதாகவே நினைக்க வேண்டியுள்ளது.

சேவியர் பள்ளியில் இடம் கிடைத்துவிட்டால் வாழ்வின் உயர்தரத்தில் முன்னேறிவிடலாம் என்ற எண்ணத்தில் இத்தொடக்கப்பள்ளியில் மூன்றாம் வகுப்புவரை பயின்று அதன்பின் அதே வளாகத்தில் உள்ள புனித அந்தோணியார் பள்ளியில் இரண்டாண்டுகள் பயின்று அதன்பின் நுழைவுத்தேர்வு எழுதி தூய சவேரியார் பள்ளிக்குப் படிக்கச் சென்ற ஆயிரமாயிரம் மாணவர்கள் திருநெல்வேலில் உண்டு..

தமிழகத்தின் பல பகுதிகளில் கல்விபற்றிய  விழிப்புணர்வு இல்லாத ஆங்கிலேயர் ஆட்சி செய்துகொண்டிருந்த அந்த முன்னைப்பழைய நாட்களிலேயே சேசுசபை அருட்தந்தையர்களால்  தூய சவேரியார் பள்ளி தொடங்கப்பட்டதும்,சாராள் தக்கர் கல்லூரி,தூய யோவான் கல்லூரி,மதுரை திரவியம் தாயுமானார் இந்துக் கல்லூரி என்று நூறாண்டுகள் நூற்றைம்பதாண்டுகள் கடந்த கல்வி நிறுவனங்கள் கொண்ட மாவட்டம் நெல்லை மாவட்டம்.

அவர்களின் உருவில் அந்தப் பள்ளியின் தாளாளர் அருட்தந்தை அந்தோனி சாமி அடிகளார்,என் அன்பு நண்பர் டாக்டர் டோனி தம்பி ராஜா ஆகியோருடன் பொன்விழாவின் சிறப்பு விருந்தினராகப் பங்கேற்றுப் பேசினேன்

.உள்ளம் நெகிழ்வின் காரணமாய் பத்துநிமிடத்திற்கு மேல் என்னால் பேசமுடியவில்லை..பள்ளி நினைவுகளும் பாடம் கற்றுத்தந்த அந்த எழுத்தறிவித்த இறைவன்களுக்கு முன் நான் அன்றும் மாணவனாகத்தான் இருந்தேன்.

பாளை.சதக்கத்துல்லாஹ் அப்பா கல்லுரியில் இஸ்லாமிய வினாடிவினா

பாளை.சதக்கத்துல்லாஹ் அப்பா கல்லுரியில் ஏப்ரல் 15 அன்று காலை 11 மணியளவில் அரபுத்துறை சார்பில் இஸ்லாமிய வினாடிவினா நிகழ்ச்சி நடைபெற்றது.கல்லூரித் தாளாளர் அல்ஹாஜ் த.இ.செ.பத்ஹூர் ரப்பானி நிகழ்ச்சியைத் தொடங்கிவைத்துத் தலைமையுரையாற்றினார்.

கல்லூரி முதல்வர் மு.முகம்மது சாதிக் வாழ்த்திப் பேசினார். 

கல்லூரிஆட்சிக்குழு உறுப்பினர் அல்ஹாஜ் எம்.கே.எம்.முகமது நாசர் ,பொறியாளர் அல்ஹாஜ் ஆதம் ஆகியோர் முன்னிலை வகித்தனர். 

கல்லூரியின் முன்னாள் அரபுத் தலைவர் பேராசிரியர் அப்துல் ஹையு வினாடி வினாப் போட்டியை நடத்தினார்.

வெற்றிபெற்ற மாணவமாணவியருக்கு கல்லூரித் தாளாளர் அல்ஹாஜ் த.இ.செ.பத்ஹூர் ரப்பானி பரிசுகள் வழங்கிப் பாராட்டினார்.

பாளை.சதக்கத்துல்லாஹ் அப்பா கல்லூரியில் பெற்றோர் ஆசிரியர் பேரவைப் பொதுக்குழுக்கூட்டம்

பாளை.சதக்கத்துல்லாஹ் அப்பா கல்லூரியில் பெற்றோர் ஆசிரியர் பேரவைப் பொதுக்குழுக்கூட்டம் 14.4.14 அன்று காலை 11.30 மணிக்குக் கல்லூரிஉரையரங்கில் நடைபெற்றது.

வணிகவியல் பேராசிரியர் பி.ஏ.அப்துல் கரீம் வரவேற்றுப் பேசினார்.

 

கல்லூரி ஆட்சிக்குழுப் பொருளாளர் அல்ஹாஜ் ஹெச்.எம்.ஷெய்க் அப்துல் காதர் விழாவுக்குத் தலைமை தாங்கினார்.

 ஆட்சிக்குழு உறுப்பினர் அல்ஹாஜ் எம்.கே.எம்.முகமது நாசர் முன்னிலை வகித்தார்.சிறப்பு விருந்தினாராக திருநெல்வேலி சூரியன் பண்பலை அறிவிப்பாளர் எஸ்.பிச்சுமணி பங்கேற்று “மாணவர்களை உருவாக்குவதில் பெற்றோரும் ஆசிரியரும்”எனும் தலைப்பில் சிறப்புரையாற்றினார்.

 

கல்லூரி முதல்வர் முனைவர் எம்.முகம்மது சாதிக் ஆண்டுநிகழ்வுகள் குறித்த விளக்க உரையாற்றினார்.கணக்கறிக்கையை வணிகவியல் பேராசிரியர் முனைவர் கே.சுப்ரமணியன் வழங்கினார்.

செயற்குழுக்கூட்ட நிகழ்வுகள் குறித்து பேராசிரியர் பி.ஏ.அப்துல் கரீம் பேசினார்.தமிழ்த்துறைத்தலைவர் முனைவர் ச.மகாதேவன் நிகழ்ச்சியைத் தொகுத்தளித்தார். 

 வணிகவியல் பேராசிரியர் முனைவர்அ.ஹாமில் நன்றி கூறினார்.பெற்றோர்,ஆசிரியர் தம் கருத்துக்கள்,ஆலோசனைகளை விளக்கிப் பேசினர்.

படத்தில்: பாளை.சதக்கத்துல்லாஹ் அப்பா கல்லூரியில் பெற்றோர் ஆசிரியர் பேரவைப் பொதுக்குழுக்கூட்டத்தில் பேராசிரியர் பேராசிரியர் பி.ஏ.அப்துல் கரீம் பேசுகிறார்.அருகில் கல்லூரி முதல்வர் முனைவர் எம்.முகம்மது சாதிக், கல்லூரி ஆட்சிக்குழுப் பொருளாளர் அல்ஹாஜ் ஹெச்.எம்.ஷெய்க் அப்துல் காதர், ஆட்சிக்குழு உறுப்பினர் அல்ஹாஜ் எம்.கே.எம்.முகமது நாசர் ஆகியோர்.

செய்தி:முனைவர் ச.மகாதேவன்

Diabetes Community Awarness Network...THE TRUE CARE MEET.. Sadakathullah Appa College

பாளை.சதக்கத்துல்லாஹ் அப்பா கல்லுரியில் நீரிழிவு நோயாளிகளுக்கான இலவச ஆலோசனை மற்றும் ஆற்றுப்படுத்தும் முகாம்

பொருளாதாரத்தில் பின்தங்கிய இளம்நீரழிவு நோயாளிகளுக்கு இலவசமருந்து உதவி

 வெளிநாடு வாழ் இந்தியப் பெண்மணி தமிழ்நாட்டிலேயே முதல்முறையாக நீரிழிவு நோயாளிகளுக்கான இலவச ஆலோசனை மற்றும் ஆற்றுப்படுத்தும் தன்னார்வத் தொண்டு அமைப்பை திருநெல்வேயில் தொடங்குகிறார். இதன் தொடக்க விழா சதக்கத்துல்லாஹ் அப்பா கல்லூரியின் சதக்கத் கிராம மேம்பாட்டுத் திட்டம் எனும் எஸ்.ஓ.பி அமைப்போடு இணைந்து வரும் ஏப்ரல் 13 ஞாயிறு அன்று காலை 10 மணிக்கு நெல்லையில் நடத்தப்படுகிறது.

                  நெல்லையைப் பூர்வீகமாக கொண்ட பீமா ஜான் என்கிற பெண்மணி தற்பொழுது ஆஸ்திரேலியாவில் குடும்பத்துடன் வசித்து வருகிறார்.இவரும் இளம் வயதிலேயே நிரிழிவு நோயால் பாதிக்கப்பட்டுத் துன்பத்திற்குள்ளானவர்.பின் அதிலிருந்து வெற்றிகரமாக மீண்டு வந்து இன்று ஒரு மருத்துவ நிறுவனத்தில் பணியாற்றிக்கொண்டே இந்தியாவின் சில பகுதிகளிலும் ஆஸ்திரேலியாவிலும் நீரிழிவு நோய்க்கு எதிரான விழிப்புணர்வை ஏற்படுத்தி வருகிறார்.உலக அளவில் முன்னூறுபேர் இந்த அமைப்பின் உறுப்பினர்களாக உள்ளனர்.

       தன் சொந்த ஊரான நெல்லையில் இதற்காக ஒரு அமைப்பை ஏற்படுத்த வேண்டும், அதன் மூலம் இளம் நீரிழிவு நோயாளிகளைக் கண்டறிந்து அவர்களை ஒன்றிணைத்துத் தேவையான ஆலோசனைகள் மற்றும் அவர்களையும் இயல்பு வாழ்க்கைக்குக் கொண்டு வரும் வகையில் ஆற்றுப்படுத்துதல் செய்வதும் மேலும் பொருளாதாரத்தில் பின் தங்கியிருக்கும் நோயாளிகளுக்குத் தன்னார்வ நண்பர்களின் உதவியோடு தேவையான மருந்துப்பொருட்கள் தந்து அவர்களுக்கு மருத்துவ சிகிச்சைக்கு உதவவும் எண்ணியுள்ளார். இதன் தொடக்க விழா சதக்கத்துல்லாஹ் அப்பா கல்லூரியின் சதக்கத் கிராம மேம்பாட்டுத் திட்டம் எனும் எஸ்.ஓ.பி அமைப்போடு இணைந்து வரும் ஏப்ரல் 13 ஞாயிறு அன்று காலை 10 மணிக்கு நெல்லையில் நடத்தப்படுகிறது.கல்லூரி முதல்வர் முனைவர் மு.முகம்மது சாதிக் தலைமையில் கல்லூரி உரையரங்கில் நடைபெற உள்ளது.கோவில்பட்டியைச் சார்ந்த சர்க்கரைநோய் நிபுணர் டாக்டர் மரியசெல்வம்,திருநெல்வேலி மருத்துவர் டாக்டர் அபுபக்கர்,பிரபல தமிழ்ப் பேராசிரியர் சரஸ்வதிராமநாதன் ஆகியோர்பங்கேற்று நீரழிவு நோயிலிருந்து எப்படி மீள்வது?என்ற தலைப்பில் உரையாற்றுகிறார்கள்.சட்டக் கல்லூரி மாணவர்கள் விழிப்புணர்வு நாடகம் நடத்துகிறார்கள்.திருநெல்வேலியைச் சார்ந்த சமூக ஆர்வலர் வெங்கட்ராமன் எழுதி இசையமைத்துள்ள நீரழிவு விழிப்புணர்வுப் பாடல் விழாவில் வெளியிடப்படுகிறது.நேயர்களின் சந்தேகங்களுக்கு மருத்துவர்கள் பதில் அளிக்கிறார்கள். பொருளாதாரத்தில் பின்தங்கிய இளம்நீரழிவு நோயாளிகளுக்கு இலவசமருந்து உதவிசெய்ய ஏற்பாடுகள் செய்யப்பட்டுள்ளன.கட்டணம் ஏதும்செலுத்தத் தேவையில்லை.விழாவைத் தமிழ்த்துறைத்தலைவர் முனைவர் ச.மகாதேவன்,பேராசிரியர் சேக் தம்பி ஆகியோர்.ஒருங்கிணைத்து நடத்துகிறார்.முகாமில் பங்கேற்க விரும்புவோர் திரு.வெங்கட்ராமன் அவர்களை செல்பேசிமூலம் தொடர்பு கொள்ளலாம்(9944452403)

cell number:9944452403