மேலும்"இலக்கிய அமைப்பு நடத்தும் ஆய்வேடு எழுதுதல் தொடர்பான பயிற்சிப்பட்டறை

திருநெல்வேலியில் உள்ள“மேலும்"இலக்கிய அமைப்பும் தமிழ்வளர்ச்சிப்பண்பாட்டு மையமும் இணைந்து இளமுனைவர்,முனைவர் பட்ட ஆய்வாளர்களுக்கு ஆய்வேடு எழுதுதல் தொடர்பான பயிற்சிப்பட்டறையை  நாளை திருநெல்வேலி,பெருமாள்புரத்தில் உள்ள தமிழ்வளர்ச்சிப்பண்பாட்டு மையஅரங்கில் நடத்துகின்றன.

அன்புடன் வரவேற்கிறோம்.

பேராசிரியர் சிவசு,முனைவர் வே.கட்டளை கைலாசம்,முனைவர் ச.மகாதேவன்,முனைவர் ந.வேலம்மாள்
”மேலும்” இலக்கிய அமைப்பு,திருநெல்வேலி

பாளை.சதக்கத்துல்லாஹ் அப்பா கல்லூரியில் கணினித் துறைத் தேசியக்கருத்தரங்கம்

 புதுடெல்லி ஐ.டி.ஐ அமைப்பும் பாளை.சதக்கத்துல்லாஹ் அப்பா கல்லூரியின் கணினித் துறையும் இணைந்து 21.3.14 மற்றும் 22.3.14 ஆகிய இருதினங்கள் தேசியக்கருத்தரங்கத்தினை நடத்தின.

  இணையத்தில் நடைபெறும் திருட்டைத் தடுக்கும் முறைகள் குறித்த தேசியக் கருத்தரங்கினை கல்லூரிமுதல்வர் டாக்டர் மு.முகமது சாதிக் தலைமையேற்றுத் தொடங்கிவைத்தார்.

கல்லூரிக் கணினித்துறைத் தலைவர் பேராசிரியர் ஏ.சாகுல் ஹமீது வரவேற்றுப் பேசினார்.முதுநிலைக் கணினித்துறைத் தலைவர் பேராசிரியை எஸ்.சாஜுன் நிஷா கருத்தரங்க அறிமுக உரையாற்றினார்.

அரசுதவி பெறா வகுப்புகளின் இயக்குநர் டாக்டர் பி.நவராஜ் சந்திரசேகரன் வாழ்த்திப்பேசினார்.

 புதுடெல்லி ஐ.டி.ஐ அமைப்பின் கணினித்துறை பாதுகாப்பு ஆய்வறிஞர் அனந்தரப்பு சைதன்ய கிருஷ்ணா இணையத்தில் நடைபெறும் திருட்டைத் தடுக்கும் முறைகள் குறித்து ஆய்வுரை வழங்கினார்.

இருநாள் மாணவர்களுக்குப் பயிற்சியளித்தார்.அரசுதவி பெறாக் கணினி அறிவியல் துறையின் உதவிப் பேராசிரியர் கே.எம்.முகமது ரியாஜுதீன் நிகழ்ச்சியைத் தொகுத்தளித்தார்.

 தேசியக்கருத்தரங்கத்தினை கல்லூரியின் இளநிலை மற்றும் முதுகணினி அறிவியல் துறைகள் சிறப்பாகச் செய்திருந்தன.

திருநெல்வேலி,சதக்கத்துல்லாஹ் அப்பா கல்லூரியில் அல்ஹாஜ் L.K.S.முகமது மீரான் முகைதீன் தரகனார் அறக்கட்டளை சொற்பொழிவு

இஸ்லாமியச் சட்டங்கள் குறித்த அறக்கட்டளைச் சொற்பொழிவினை ஆண்டுதோறும் சதக்கத்துல்லாஹ் அப்பா கல்லூரியில் அல்ஹாஜ் L.K.S.முகமது மீரான் முகைதீன் தரகனார் அறக்கட்டளையின் மூலம் கல்லூரி நடத்திவருகிறது.

கல்லூரித் தமிழ்த்துறைத் தலைவர் முனைவர் ச.மகாதேவன் வரவேற்றுப் பேசினார். 

 கல்லூரித் தாளாளர் அல்ஹாஜ் த.இ.செ.பத்ஹூர் ரப்பானி அவர்கள் தலைமைஉரை ஆற்றினார்.

 சென்னை உயர்நீதிமன்ற மூத்த வழக்கறிஞர் திரு.வள்ளிநாயகம் ‘இஸ்லாமும் தமிழும் ‘ என்ற தலைப்பில் வாழ்த்துரை வழங்கினார்கள்.

கல்லூரி முதல்வர் முனைவர் மு.முகமது சாதிக் வாழ்த்திப் பேசினார்.மாண்புமிகு நீதியரசர் திரு. R.S.ராமநாதன் அவர்கள்,சென்னை உயர்நீதிமன்றம். நாள்: 15.3.2014 காலை 10 மணியளவில் “இளம்சிறார் நீதி(குழந்தைகள் மற்றும் பராமரிப்பு பாதுகாப்பு) சட்டமும் இஸ்லாமும்”எனும் பொருளில் சிறப்புரையாற்றினார்கள்..

திருக்குர்ஆன் குறித்தும் நபிகள் நாயகம் (ஸல்) அவர்களின் வாழ்வியல் வழிமுறைகள் குறித்தும் இஸ்லாமியச் சட்டம் குறித்தும் நீதியரசர் R.S.ராமநாதன் அவர்கள் அழகான சொற்களோடு  சிறப்புரையாற்றியது சிறப்பாய் இருந்தது.

உச்சநீதிமன்றத்தீர்ப்பினை மேற்கோளாகக் காட்டிப் பேசினார்.ஆட்சிக்குழு உறுப்பினர்கள் பொறியாளர் திரு.L.K.M.A.முகம்மது நவாப் ஹுசைன் ,அல்ஹாஜ் கே.ஏ.மீரான் மைதீன் ஆகியோர் முன்னிலை வகித்தனர்.

மேலப்பாளையம் முஸ்லிம் மேல்நிலைப்பள்ளியின் துணைத்தலைவர் திரு. L.K.S. மீரான் முகைதீன் நெகிழ்வான நன்றியுரை ஆற்றினார்.

சதக்கத்துல்லாஹ் அப்பா கல்லூரியில் அல்ஹாஜ் L.K.S. முகமது மீரான் முகைதீன் தரகனார் அறக்கட்டளைச் சொற்பொழிவு

சிறப்புரை: மாண்புமிகு நீதியரசர் திரு. R.S.ராமநாதன் அவர்கள்,சென்னை உயர்நீதிமன்றம்.

நாள்: 15.3.2014 காலை 10 மணி

தூய சவேரியார் கல்லூரித் தமிழ்த்துறை நடத்திய ராபர்ட் டி நொபிலி அறக்கட்டளைச் சொற்பொழிவு:முனைவர் ச.மகாதேவன்

மாணவர்களிடம் பேசுவது என்றாலே என்றும் இனிக்கத்தான் செய்கிறது.

 

குறும்போடும் சுறுசுறுப்போடும் கொங்குதேர் வாழ்க்கை நடத்திக்கொண்டிருக்கும் என் அன்பு மாணவர்களே என்றும் என் சொத்து.

 

தமிழாய்ந்த அறிஞர்கள் சபையில் பேசுவதைவிட மாணவர்களிடம் பேசுவது மிகவும் பிடித்தமானது.

வழிதவறிப்போன வழிப்போக்கன் மாதிரி மொழிதவறித் தவிக்கிறோம்.

மொழியின் உன்னதத்தை மாணவர்களிடம் உரக்கச்சொல்லிக்கொண்டேயிருக்கிறேன்.

அவர்கள்தான் எதிர்கால நம்பிக்கைகள்.ஊர்ந்து செல்லும் உருத்திரப்பாம்புகளாய் நம்மோடு சேர்ந்து பயணிக்கின்றன சில கனமான கணங்களும்.

உயரம் விட்டிறங்கும்போது துயரப்படும் வயிறு மாதிரி சுழற்றிஎறியும் வாழ்வின் கனங்களில் துயரப்படுகிறோம் சகமனிதர்களின் பாடுகளுக்காக.

தெரியாத பலவற்றைத் தெரிந்ததாய் காட்டி தெளிவில்லாமல் கலங்கலாய் நகரும் இப்புதிர் வாழ்வை நான் புரிந்துகொண்ட விதத்தைத் தினந்தோறும் என் மாணவக்கண்மணிகளுக்குச் சொல்லிக்கொண்டேயிருக்கிறேன்.

நான் பயின்ற பாளையங்கோட்டை தூய சவேரியார் கல்லூரித் தமிழ்த்துறையிலிருந்து அன்பு அழைப்பு.தமிழுக்குத் தொண்டாற்றிய தண்டமிழ்த்தென்றல் ராபர்ட் டி நொபிலி அவர்களின் பெயரில் அமைந்துள்ள அறக்கட்டளையில் சொற்பொழிவாற்ற வேண்டும் என்ற அன்பு அழைப்பு இளங்கலைத் தமிழ்த்துறையின் ஒருங்கிணைப்பாளர் பேராசிரியர் அ.ஜான்பால்அவர்களிடமிருந்து அன்பு அழைப்பு..மறுக்கஇயலுமா? 

உடன் ‘கவிதையெனும் பெருமொழி’ எனும் தலைப்புத்தந்தேன்.மேடைக்கு வந்தவுடன் நகுலனின் முள் போன்ற இளம்வெண்தாடிமுகம் நினைவுக்கு வரவே

 

‘’இருப்பதற்கென்றுதான்

வருகிறோம்

இல்லாமல்

போகிறோம்’’ 

கவிதையோடு தொடங்கினேன்.அப்படியொரு அமைதி அந்த இளங்கலை மாணவமாணவியரிடம்.

பாரதியின் ‘’அக்கினிக் குஞ்சொன்று கண்டேன்’’கவிதை மாணவர்களுக்கு என்றும் பிடித்ததாய் இருந்தது.

நிழற்படப்பதிவுக்கருவியாய் தாம் கண்ட காட்சியைக் கவிதையாக்கும் கல்யாண்ஜியின் ‘’கக்கத்துக் குடையைப்போல் பெரிதாகக் கிழிந்துபோச்சோ அவன் வாழ்க்கை’’ என முடியும் கவிதை சொன்னேன்.

ந.பிச்சமூர்த்தியின் ‘கொக்கு’ கவிதை,தருமு சிவராமின் படிமக்கவிதையான

‘’சிறகிலிருந்து பிரிந்த

இறகு ஒன்று

காற்றின்

தீராத பக்கங்களில்

ஒரு பறவையின் வாழ்வை

எழுதிச் செல்கிறது’’ 

எனும் கவிதை சொன்னபோது மாணவர்களுக்குப் புரியச்சற்று நேரமானது.

கு.ப.ரா.,சி.மணி,வைதீஸ்வரன்,பசுவய்யா,மீரா,விக்கிரமாதித்தன்,மேத்தா,கவிக்கோ,சிற்பி என்று சொல்லிக்கொண்டு வந்தேன்.கலாப்ரியாவின் ‘வனம்புகுதல்’ கவிதையோடு நிறைவு செய்தேன்.

கடலை எப்படி கைக்குள் அடக்குவது?மாணவர்களுக்குச் சில நல்ல கவிதைகளை அறிமுகபடுத்திய மனநிறைவோடு கிளம்பினேன்.

.தமிழில் சிறப்பிடம் பெற்ற மாணவியருக்கு இணைமுதல்வர் பேராசிரியர் தாமஸ்புனிதன்,தமிழ்த்துறைத்தலைவர் பேராசிரியர் அ.மணி ஆகியோர் பரிசுகள் வழங்கினர்..

கற்றுத்தந்த அந்த ஆலயம் பெற்றுத் தந்ததுதானே இந்தப்பெயரும் இன்பத் தமிழும்